FAQJA KRYESORE
BIOGRAFIA

Shqiptari i parë që mbron titullin e lartë Prof. Dr. në Lindjen e Mesme

Vjollca Lisi / Kairo (EGJIPT), më 5 prill 2004

• 15 vjet veprimtari informative dhe gazetareske për Kosovën, përmes agjencisë “Albapress”!
• 600 shkrime me temë shqiptare të botuara në shtypin arab .
• 107 libra në arabisht e 4 në shqip në fusha të ndryshme të kulturës.
• Mbron titujt “Masters” dhe “Doktor” me studime në lëmin e gjuhësisë
• I pari shqiptar me titullin e lartëProf.Dr. i laureuar në Lindjen e Mesme

“Albapress” është një qendër informative shqiptare për Kosovën dhe shqiptarët jasht atdheut. Ndodhet pranë zonës universitare të Kairos, në Qytetin e Nasser-it. E njohur dhe e frekuentuar nga shqiptarë dhe miq e dashamirë të tyre vendas si dhe nga studentë të Universiteteve të ndryshme të Kairos, ajo njihet edhe si“Qendra kulturore e shqiptarëve”. E drejton një koleg gazetar nga Fushë Kosova, Beqir Ismaili, i cili është njëkohësisht dhe nismëtar i ngritjes, më 1990, të kësaj agjencie për shpërndarje informacioni për trevat shqiptare në botën e Lindjes së Mesme.

Jo rastësisht –thotë Beqiri- fillimet e “Albapress”-it përkojnë me ngjarjet tragjike në vendlindje, në Kosovë. E ndjeja se opinioni, mediat dhe publiku arab, kishin nevojë të informoheshin edhe nga “burimi” për sa po ndodhte në Kosovë, ta njihnin të vërtetën, atë të vërtetë që jo gjithnjë trasmetohej gjërësisht dhe objektivisht nga mediat ndërkombëtare në përgjithësi”. Në atë kohë të stuhishme për Kosovën, “Albapress” iu vu punës me përkushtim dhe këmbëngulje. Janë të shumta veprimtaritë e kryera në atë kohë në Kairo dhe në qytete të tjera të vendit; përmendim një ekspozitë –shëtitëse me mbi 500 fotografi, dokumenta e poster, që u ekspozua në ambjentet kryesore të Universitetit të Kairos, në atë Amerikan dhe në Universitete të tjera të Egjiptit .

Nën ndikimin e këtij materiali të gjallë dhe jetik”- kujton Beqiri- janë zhvilluar në Kairo demostrata nga më të fuqishmet kundër dhunës dhe krimit serb në Kosovë.” Ligjërimet, tubimet, diskutimet informimi, në të gjitha fushat, edhe në median e shkruar dhe në atë elektronike, shkrimet, intervistat (rreth 600)në shtypin arab ( jo vetëm egjiptian) si dhe përgatitja dhe shpërndarja e përditëshme e buletinit informues për Kosovën në 50 institucione të ndryshme arabe në Kairo, përfshirë këtu edhe disa përfaqësi diplomatike, janë një realitet doemthënës i veprimtarisë së “Albapress”-it dhe të Beqir Ismailit. Ndër shkrimet informative për kulturën dhe entitetin e shqiptarëve në përgjithësi dhe të Kosovës në veçanti,ka shkruar për 69 figura shqiptare, (personalitete të njohur në fusha të ndryshme) në shtypin arab.

Kështu “u rrit” ndër vite kjo agjenci, u bë e njohur, e respektuar dhe gjithnjë e më shumë e frekuentuar nga shqiptarë e vendas.Edhe sot, kur ndodhesh në zyrat e “Albapress”-it të rastis të takohesh me profesorë apo intelektualë të njohur egjiptas, të cilët pohojnë me dashamirësi:” Falë kësaj qendre kulturore dhe atdhetare, kemi njohur Kosovën dhe shqiptarët”.

Kush është Beqir Ismaili?

Ka lindur në Kosovë, më 1959. Arsimin tetëvjeçar e kreu në shkollën “Emin Duraku” në Prishtinë, kurse të mesmin, në Damask, të Sirisë.

I edukuar në një familje patriote e me tradita fetare , me mbarimin e shkollës së mesme, realizoi ëndrrën për të studiuar në Universitetin “ Al Az-harit” në Kairo, një nga më të vjetrit dhe më të njohurit në botë. U diplomua në Fakultetin e Gjuhës Araba, pranë këtij Universiteti.

Më pas, në një kohë rekord dhe me rezultate të larta, përfundon studimet në Institutin për Studime të Larta Islame, gjithnjë në Kairo.

Prirjet e tij në gazetari e shtyjnë të bashkpunojë, si student nga Kairo, (në shqip) me disa organe shtypi shqiptare dhe kosovare, si “Rilindja” “Bujku”,”Zëri i Rinisë”,”Republika”,Drita islame” si dhe në “Shkëndija”. Në vitet ’90, me hapjen e qendrës “Albapress” Beqiri i futet një tjetër ndërmarrje të guximshme: studimit të mëtejshëm të gjuhës shqipe dhe arabe nga njera anë dhe botimeve publicistike, nga ana tjetër. Njohjet e kontaktet e shumta me njerëz, qytetarë të thjeshtë, gazetarë, profesorë, diplomatë, shkencëtarë e filozofë, përbëjnë bazën e një materiali të gjërë dhe të bollshëm faktesh, për t’u studjuar, sistemuar dhe botuar më pas në 107 tituj librash! Të gjithë në arabisht dhe 4 tituj të tjerë në gjuhën shqipe.

Botimet janë të ndara në 14 fusha të ndryshme, të cilat, si një fill i kuq i përshkon një ide: njohja e Kosovës dhe e shqiptarëve nga Bota, nga njera anë, dhe mirnjohja për gjithë ata intelektualë të shquar arabë, egjiptianë dhe jo, të cilët kanë dhënë një ndihmesë të konsiderueshme për çëshjen e shqiptarëve dhe të pavarësisë së Kosovës në veçanti. Librat e botuar janë kështu, një frut i njohjeve, i kontakteve direkte, vetjake, me përfaqësues fushash e disiplinash të kulturës e të mendimit arab, ndër ta dhe figura me famë ndërkombëtare. Botimet e tij përfshijnë fusha të ndryshme si letërsi, civilizim dhe bibliografi të shkencëtarëve, mendimtarëve e intelektualëve të shquar.

Në arkivin e “Albapress”-it janë të evidentuara me foto, rreth 600 takime që Beqiri ka zhvilluar me personalitete nga e gjithë bota,( dhe jo vetëm në Egjipt) që nga ato shqiptare deri diplomatë e autoritete të larta vendase.

Edhe shtypi arab, nga ana tjetër, i ka përcjellë me mjaft interes botimet e tij. Librat e Beqirit janë të ekspozuara gjithnjë në një stendë të veçantë në Panairin Ndërkombëtar të Librit në Kairo ( që organizohet çdo vit dhe është i dyti në botë, pas atij të Frankfurtit). Para disa kohësh, mbron me sukses titullin “Kandidat i Shkencave” (magjistër), në Fakultetin e Gjuhësisë dhe të Letërsisë në Universitetin e Hapur Amerikan në Kairo, me temën: “Ndikimi i gjuhës arabe në gjuhën shqipe” dhe më pas merr titullin “Doktor i Shkencave” në Fakultetin e Gjuhës dhe Letërsisë Arabe në Univesitetin e Hapur Amerikan, në Kairo, me temën: “Zhvillimi i Gjuhës dhe Letërsisë arabe në Kosovë”.

Arsimimi i tij në Universitetin e famshëm të Al-Az’harit, kontakti me dijetarë të mirënjohur që ligjërojnë në këtë Universitet, bën që Prof. Dr. Ismaili të formojë kritere të rrepta shkencore dhe metoda origjinale në punën e tij intelektuale disa-planëshe. Ky impenjim i vazhdueshëm, brenda një kohe të shkurtër tërheq vëmendjen e specialistëve më të lartë të Universitetit të Al-Az-harit. Vlerësimi që ata i bënë punës dhe veprës së tij ishte shumë domethënës. Bazuar në numrin e madh të veprave të shkruara nga Prof. Dr. Ismaili dhe në vlerat shkencore që paraqisnin ato, Universiteti i Shkencave Islame, dega e Gjuhësisë dhe Letërsisë Arabe, i jep para disa ditësh, titullin e lartë “Profesor Doktor i Gjuhës Arabe”.

Është një eveniment i bukur dhe prekës për të gjithë, pasi përbën rastin e parë në historinë e kombit shqiptar, që një shqiptar nga Kosova të vlerësohet me një titull të tillë, nga një Universitet me emër në Lindjen e Mesme. Për marrjen e këtij titulli të lartë, Prof Dr. Ismaili paraqiti 8 libra voluminozë ( nga 6 që është numri i detyrueshëm) në arabisht, nga fushat e kulturës dhe të gjuhësisë.

Prof.Dr. Beqir Ismaili duket se ka ndryshuar fare pak, për të mos thënë aspak, nga marrja e gjithë këtyre titujve të nderit. Është e vërtetë, është pak më i thinjur, më reflektues në mendime, por gjithsesi, përherë i palodhur dhe produktiv . Përparësi në punën dhe në jetën e tij të përditëshme është të japë një ndihmesë, sado modeste, për vendlindjen e tij amë, Kosovën, për brezat që vijnë nga Shqipëria, nga Kosova dhe nga Maqedonia për të studjuar në Universitetin e Shkencave Islame, ku ai gëzon të drejtën të jetë tashmë, anëtar nderi në kryesinë e tij, apo në Universitete të tjera, ku ai e ka “portën përherë të hapur”..

Si njohës i shkëlqyer i gjuhës arabe, nuk pushon së përcjelluri, njohuri, kulturë, tradita, histori e veçori të botës shqiptare në botën arabe. “ Kam menduar të mund të botoj diçka nga këto edhe në shqip, mundësisht në Kosovë” thotë Prof.Dr. Ismaili.

Prania e tij në Egjipt u ka dhënë përherë mundësinë studentëve shqiptarë, që studiojnë në këtë vend, të ndjehen si në shtëinë e tyre. Në kuptimin e plotë dhe të vërtetë të kësaj fjale. Si një baba, si vëlla, si mik e shok dhe si mësues. Por ajo që ndikon më shumë tek këta studentë, (dhe padyshim, jo vetëm tek këta) është shembulli vetjak i Beqir Ismailit, ndershmëria, dinjiteti, bujaria dhe modestia, cilësi këto që u njihen botërisht shqiptarëve të mirë nëpër botë.

Aktualisht, Prof. Dr Beqir Ismaili është edhe përfaqësues i Universitetit të Hapur Amerikan për Ballkanin dhe udhëheqës shkencor( si anëtar Komisioni) i specialistëve shqiptarë , kosovarë dhe të huaj, që studjojnë për marrje tituj e gradash shkencore në këtë Universitet.

Një libër i Prof.Dr Ismailit, ai me titull ”Ndikimi i alfabetit arab në letërsinë shqipe në Kosovë”- thotë Prof.Dr Saber Abdul, Zv Rektor i këtij fakulteti-është futur si lëndë studimi në Fakultetin e Gjuhës Arabe, në Universitetin ” Al Ah-zar”!

Profesori i famshëm egjiptian shprehet me krenari dhe cilido shqiptar dashamirës, do të emocjonohej kur ta dëgjonte të shprehej me këto fjalë!

Nga z. Abdul mësova se janë dhe dy studentë të huaj në këtë Universitet, të cilët kanë shprehur dëshirën të mbrojnë titullin “Doktor” në studimin për veprimtarinë e Prof.Dr Beqir Ismailit, si intelektual dhe gazetar.

Do ta mbyll këtë “portret” të Beqir Ismailit duke rradhitur edhe forumet e institucionet më të rëndësishme në Egjipt, ku ai është pranuar si anëtar i tij!.

[1] Bashkimi i Shkrimtarëve të Egjiptit.
[2] Shoqata Egjiptiane për studime historike.
[3] Shoqata e letrarëve Egjiptianë {Shtëpia e letrarëve}.
[4] Shoqata e filozofëve të Egjiptit.
[5] Shoqata e përgjithëshme të mjeteve të informacionit (qendra gazetareske) në Kairo.
[6] Shoqata e gazetarëve të huaj në Kairo.
[7] Instituti Shkencor për hulumtimin e Kur’anit dhe të Traditës Profetike në Egjipt.

Desha, së fundi,të “sqaroj” publikun se anëtarësimi në këto forume nuk është i vetvetishëm për të gjithë intelektualët e shkencëtarët egjiptianë të një fushe të caktuar.

Ja ç’thuhet ndër të tjera në motivacionin me të cilin Prof.Dr Beqir Ismaili nga Kosova është pranuar në Bashkimin e Shkrimtarëve të Egjiptit:” Për ndihmesën e dhënë në njohjen e Kosovës, të entitetit të saj historik e kulturor dhe për pasurimin, përmes librave të tij, të kulturës arabe dhe të asaj ndërkombëtare”.