Faqet personale te prof.dr. Beqir Ismailit

Nënshkruhet në Kairo marrëveshja e parë e bashkëpunimit midis Universitetit të Kairos dhe atij të Prishtinës

Nga Vjollca Lisi

Në vigjilje të Festës sonë Kombëtare, u nënshkrua në selinë qendrore të Universitet të Kairos, një marrëveshje bashkëpunimi didaktik, shkencor dhe kulturor, midis dy institucioneve univiersitare: përkatësisht midis Universitetit të Kairos dhe Universitetit të Prishtinës. Kjo është marrëveshja e parë që nënshkruhet zyrtarisht dhe që i jep udhë një bashkëpunimi gjithnjë e më aktiv e më të frutshëm, midis këtyre dy qendrave të rendësishme të shkollimit, specializimit dhe përgatitjes së kuadrove dhe specialistëve të të gjitha fushave të dijes.

" Fakti që një numër gjithnjë në rritje të rinjsh shqiptarë nga Shqipëria , nga Kosova, Maqedonia e trevat e tjera shqipatere, diplomohen dhe specializohen për çdo vit në Universitetin e Kairos, përbën një shtytje për zyrtarizimin dhe zhvillimin e mëtejshëm të bashkëpunimit shumplanësh midis dy Universiteteve"- thotë menjëherë pas nënshkrimit të marrveshjes, Prof.Dr. Beqir Ismaili, i cili ka përfaqësuar palën universitare kosovare. Vetë Prof Dr. Ismaili, është diplomuar, specializuar , ka doktoruar dhe madje, ka marrë titullin e lartë "Profesor Doktor në Gjuhën Arabe"( dhe është i pari shqiptar me këtë titull të marrë në Kairo) .

Marrëveshja në fjalë, përmes disa neneve, përfshin bashkëpunim shumplanësh në të gjitha fushat e studimit, të kërkimeve shkencore, të humultimeve, të shkëmbimit të përvojës së ndërsjelltë, në hartimin e programeve të veçanta për fusha të ndryshme bashkëpunimi, në këmbimin e përvojës, të grupeve të specialistëve, profesorëve, lektorëve apo dhe të studentëve. Në marrëveshje parashikohen dhe vizitat me karakter njohje dhe përfitimi të ndërsjelltë, midis drejtuesve të këtyre dy institucioneve, në organizimin e veprimtarive të ndryshme kulturore, arsimore dhe shkencore, dypalëshe dhe shumpalëshe, në përfshirjen edhe të institucioneve të tjera përkatëse të të dy vendeve si dhe të atyre ndërkombëtare, në realizimin e këtyre projekteve e planeve të bashkëpunimit.

Pak histori- Universiteti i Kairos është qendra më e madhe shkencore, didaktike dhe pedagogjike në Egjipt. Historikisht, njihet dhe si Universiteti i parë laik në vend. Në dokumentat themeltare të tij, lidhur me krijimin dhe ngritjen e këtij institucioni- në fillimet e shekullit të xx-të- nga dijetarë, mendimtarë, atdhetarë e politikanë vendas, thuhet:" Krijimi i këtij universiteti të parë egjiptian do të jetë rezultat i të gjitha përpjekjeve të mëparëshme të bëra për këtë qëllim dhe do të shërbejë si një vatër e mendimit të lirë, shkencor bashkëkohor, për të qenë i aftë për të bashkëpunuar me akademitë moderne të kohës, në fusha të ndryshme të njohjes, të shkencës dhe të dijes." Megjithë pengesat e kohës, Universiteti i Kairos( atëherë u quajt i Egjiptit) u inaugurua më 21 dhjetor të vitit 1908, në praninë- në ceremoninë madhështore të rastit- e Princit Abbas( nip i familjes mbretërore të Mohamed Ali Pashës) dhe të akademikëve të njohur dhe të mjaft kryetarë shtetesh. Fakt interesant është se Universiteti e filloi veprimtarinë, pikërisht në ditën ( më saktë, në mbrëmjen) e përurimit të tij, në formën e leksioneve të përgjithëshme, që u zhvilluan në disa zona të Kairos. Në vitet e vështirësive të mëdha financiare për ngritjen e Universitetit, një ndihmesë të çmuar ka dhënë personalisht princesha Fatma Ismail( e bija e Princit Ismail, nip i Mohamed Ali Pashës) duke dhuruar njërën nga banesat e saj si seli kryesore e këtij Universiteti.Gjithashtu, ajo ndihmoi energjikisht, me shuma të mëdha financiare, për ngritjen e pjesës tjetër të Universitet. Më pas, princi Fuad Ismail( i vëllai i Fatmës dhe i ati i mbretit Faruk- i diplomuar dhe specializuar nëpër universitetet më të njohura evropiane të kohës-) u emërua i pari Rektor i këtij Universiteti dhe ndër të parët profesorë të tij. Në vitet e Luftës së Parë Botërore, edhe më pas, Universiteti i Kairos synoi në dërgimin e studentëve vendas nëpër Evropë, për t'u diplomuar, specializuar e doktoruar atje e për t'u kthyer më pas në atdhe, për të trasmetuar në auditorët e këtij Universiteti, përvojën dhe dijet e marra.

Në vitet '20 dhe '30 të shekullit të kaluar, Universiteti i Kairos, njohu rritje, zhvillim e zgjerim fakultetesh, akademish e kolegjesh edhe në fusha të tjera, si në legjislacion, në mjekësi, në arte, si dhe në pasurimin e vazhdueshëm të Bibliotekës, me vëllime origjinale të autorëve të njohur vendas dhe të huaj.

Sot Universiteti i Kairos konsiderohet si Universiteti publik mëmë, në raport me qendrat e tjera shkencore dhe universitare, më të reja, të ngritura në Kairo, siç janë "Universiteti Amerikan", "Universiteti Ain Shams", "Universiteti i Helwanit" në Kairo dhe në qytete të tjera të vendit, si ai i Aleksandrisë, i Sugahës, i Fajumit, i Minias, "Universiteti i Suezit" ,etj, të ngritura jasht Kairos. Ai përbën dhe një qendër të fuqishme dhe aktive të edukimit dhe të specializimit për studentë, studjues e specialistë të huaj, arabë dhe të të gjitha kontinenteve të botës.

Pak shifra:Aktualisht Universiteti i Kairos përfshin 100 qendra kërkimore dhe shkencore, publike e private. Këtu bëjnë pjesë dhe qendra hospitalore në dispozicion të studentëve, qendra poligrafike, libraria qendrore dhe ato të specializuara për çdo fakultet. Në këtë Universitet përfshihen 23 fakultete dhe Institute, ku studjojnë rreth 165.000 studentë, japin leksione rreth 3160 profesorë të kualifikuar si dhe 2370 asistentë dhe ku punon një personel prej 12.240 personash.

Marrëveshja e bashkëpunimit midis Universitetit të Kairos dhe Universitetit të Prishtinës është e vlefshme për tre vjet dhe mund të përtërihet sërish, me vullnetin dhe dëshirën e ndërsjelltë të të dy institucioneve.

Për palën egjiptiane, marrëveshja u nënshkrua nga rektori i Universitetit te Kajros, Prof.Dr.Ali Abdurrahman Jusuf dhe për palën kosovare, nga përfaqësuesi i Universitetit të Prishtinës në Kairo,Prof.Dr.Beqir Ismaili.