FAQJA KRYESORE
DIPLOMACI

Nënshkruhet në Kairo marrëveshja e bashkëpunimit kulturor midis Kosovës dhe Egjiptit.

Nga Vjollca Lisi

Më 19 shkurt, u nënshkrua në selinë e Ministrisë së Kulturës,të Egjiptit, një marrëveshje kulturore pesëvjeçare midis këtij institucioni dhe atij homolog të Kosovës.

Është e para marrëveshje që nënshkruhet në këtë fushë , midis dy vendeve, për një afat kohor të tillë, madje dhe me të drejtë përtëritje , pra dhe për një periudhë të mëtejshme, me pëlqimin dhe impenjimin e të dyja palëve të interesuara.

Marrëveshja kulturore, përmban disa nene, ku parashikohen projekte konkrete bashkëpunimi, në fusha të ndryshme të kulturës- arteve, kinematografisë,operas, baletit,teatrit, trashëgimisë së kulturës popullore tradicionale, të bibliotekave, muzeumeve,etj- në shkëmbim të ndërsjelltë përvoje, specialistësh, artistësh, shkrimtarësh, punonjësish të sektorëve të ndryshëm të kulturës, drejtuesish institucionesh kulturore. Në të parashikohen dhe pjesmarrje në veprimtari të përbashkëta kulturore dhe artistike(në festivale filmash, në panaire kombëtare dhe ndërkombëtare librash, në shkëmbime grupesh artistike, valltarësh, muzikantësh,etj),apo dhe në veprimtari të organizuara prej njërës nga palët nënshkruese të marrëveshjes ( siç është rasti i pjesmarrjes, për shembull, të një delegacioni kulturor egjiptian në “Javën e Bibliotekës së Prishtinës”, apo dhe i një delegacioni kosovar në veprimtaritë ndërkombëtare që do të organizohen në Kairo, me rastin e 200 vjetorit të qeverisjes së Egjiptit nga Muhamet Ali Pasha); në veprimtari ndërkombëtare të organizuara nga institucione kulturore përkatëse-siç është UNESCO-e me rradhë.Në marrëveshje parashikohet zbatimi i projekteve të miratuara nga të dyja palët e interesuara, sipas ligjeve dhe dispozitave përkatëse kombëtare dhe ndërkombëtare.

Është kjo marrëveshja e pestë që nënshkruhet në një hark kohor relativisht të shkurtër- brenda 6 muajve- midis Egjiptit dhe Kosovës. Më parë janë vendosur lidhjet midis Arkivave të Egjiptit dhe Arkivit Kombëtar të Kosovës,pastaj u arrit marrëveshja midis Universitetit të Kairos dhe atij të Prishtinës,marrëveshja e tretë ishte ajo midis Ministrisë së Rinisë dhe Sporteve dhe homoges së saj kosovare; e katërta, midis Bibliotekës së Aleksandrisë dhe Bibliotekës Kombëtare të Kosovës. Në lidhjet, kontaktet dhe diskutimet me specialistë dhe personalitete drejtues të këtyre institucioneve kulturore, arsimore dhe sportive të Egjiptit, është vërejtur një interesim i dukshëm për lidhje dhe bashkëpunim të ndërsjelltë me Kosovën, gadishmëri për njohje dhe shkëmbim të ndërsjelltë përvoje në këto fusha, ndihmë dhe përkrahje për zhvillimin e mëtejshëm të lidhjeve tradicionale miqësore dhe kulturore midis dy popujve.

Marrëveshja kulturore u nënshkrua për palën egjiptiane nga zv ministri i Kulturës,Sherif Shubashi dhe për palën kosovare, nga Prof.Dr Beqir Ismaili- i ngarkuar me detyrën e përfaqësuesit dhe të koordinatorit të lidhjeve të bashkëpunimit midis Kosovës dhe Egjiptit e Lindjes së Mesme.